२०७७ फागुन ९ गते

काठमाडौं । नेकपा ओली पक्षले आज पनि प्रदेश १ को बैठक अवरुद्ध पार्ने भएको छ । प्रदेश १ का मुख्यमन्त्री शेरधन राईविरुद्ध दर्ता भएको अविश्वास प्रस्तावलाई प्रक्रियामा जानै नदिने रणनीतिसहित ओली पक्षले प्रदेश सभामा होहल्ला गरेर अवरुद्ध पार्ने आन्तरिक तयारी गरेको छ ।

बागमती प्रदेशका मुख्यमन्त्री डोरमणि पौडेलविरुद्ध पनि अविश्वासको प्रस्ताव दर्ता भइसकेको छ । त्यसैले ओली पक्षले केन्द्रमा प्रतिनिधिसभा विघटनका विषयमा सर्वोच्च अदालतमा परेको मुद्दामा अदालतको निर्णय आउने वित्तिकै प्रदेश सभाका विषयमा निर्णय लिने आन्तरिक तयारी गरेको छ ।

आफ्नो पक्षका मुख्यमन्त्रीविरुद्ध अविश्वास प्रस्ताव फिर्ता गराउन पहल गर्ने, त्यसो नगरे प्रदेश सभा प्रतिनिधिसभा सम्बन्धी सर्वोच्चमा परेको मुद्दाको निर्णय नआउँदासम्म चल्नै नदिने र अदालतको फैसला आएलगत्तै विघटन गर्ने तयारीमा ओली पक्ष लागेको छ । त्यसको खुलासा प्रदेश १ का मुख्यमन्त्री शेरधन राईले गरिसकेका छन् ।

सर्वोच्च अदालतले बढीमा शुक्रबारसम्म आफ्नो फैसला सुनाउने भएको छ । अहिलेसम्म प्रतिनिधिसभा पुनःस्थापना हुने सम्भावना बढेको छ । त्यसैले अदालतको फैसला आएलगत्तै प्रदेश सभामाथि एक्सन लिने तयारी भित्री रुपमा थालेको छ । दुवै प्रदेशमा महिना दिन पुग्न लाग्दासमेत ओली पक्षले प्रदेश सभा बैठक नै बस्न नदिई आफूविरुद्ध परेको अविश्वास प्रस्तावमाथिको छलफलको प्रक्रियालाई नै बन्धक बनाइरहेको छ ।