काठमाडौँ, बिहिबार, २९ असोज २०७७ । एप्पलले आइफोन १२ का मोडलहरू सार्वजनिक गरेको छ।
मंगलबार भएको भर्चुअल कार्यक्रममा एप्पलले आइफोन १२, आइफोन १२ प्रो, आइफोन १२ प्रो म्याक्स र आइफोन १२ मिनी गरी चारवटा नयाँ आइफोन एकसाथ सार्वजनिक गरेको हो । यी सबै मोडलमा ५ जी नेटवर्कको सुविधा छ ।
एप्पलको आइफोन १२ मा ६.१ इन्चको स्क्रिन रहेको छ । यसमा ए१४ बायोनिक प्रोसेसर रहेको छ । आइफोन १२ निलो, हरियो, कालो, सेतो र रातो रङमा उपलब्ध हुनुका साथै ६४ जिबी, १२८ जिबी र २५६ जिबी इन्टर्नल स्टोरेज मोडेलमा उपलब्ध हुनेछ । आइफोन-१२ मा पछाडि १२ मेगापिक्सलको मुख्य क्यामरा र १२ मेगापिक्सलकै अल्ट्रा वाइड गरी दुइटा क्यामरा छन्। सेल्फी क्यामरा पनि १२ मेगापिक्सलकै छ । यसको सूरुवाती मूल्य ७ सय ९९ डलर तोकिएको छ ।
यस्तै, आइफोन १२ मिनीमा ५.४ इन्चको डिस्प्ले छ। यसलाई कम्पनीले संसारकै सानो र हलुका ५ जी फोन भनेको छ । यसको तौल जम्मा १३५ ग्राम भएको कम्पनीले जनाएको छ। यसको कुल लम्बाइ ५.१८ इन्च छ भने चौडाइ २.५३ इन्च छ । अन्य स्मार्टफोनभन्दा यसलाई फोनको पफर्मेन्स पहिलेभन्दा ५० प्रतिशत बढी दिने बताइएको छ । यसको मूल्य ६९९ डलरबाट सुरू हुनेछ ।
आइफोन-१२ प्रो र आइफोन-१२ प्रो म्याक्स भने निलो, खैरो, सिल्भर र पहेँलो ४ फरकफरक प्रकारका रङमा उपलब्ध हुनेछन् । आइफोन-१२ प्रो मा ६.१ इन्च डिस्प्ले हुनेछ । यसको पछाडि तीन वटा क्यामरा छन् । यसमा लिडार स्क्यानर रहेको छ । यसबाट फोटो चार गुना बढी नजिक जुम गरेर खिच्न सकिन्छ । यसले कम प्रकाशमा समेत उत्कृष्ट तस्वीर खिच्न सहयोग गर्नेछ ।
यो फोन १२८ जिबी, २५६ जिबी र ५१२ जिबी स्टोरेजका साथ आउनेछ। यसको अर्को विशेषता भनेको यो वाटरप्रुफ हो । कम्पनीका अनसार ६ मिटर गहिरो पानीमा करिब ३० मिनेटसम्म डुब्दा पनि फोन बिग्रिने छैन । कफी, सोडा वा अरू पेय पदार्थ पोखिए पनि फोनमा कुनै असर नपर्ने कम्पनीको भनाइ छ ।
यस्तै, आइफोन १२-प्रो म्याक्स ६.७ इन्च डिस्प्लेको साथ आउने छ। यो हालसम्मकै ठूलो आइफोन भएको कम्पनीले जनाएको छ । यसमा पनि ट्रिपल क्यामरा सेटअप रहेको छ जसका फिचर आइफोन १२ प्रोकै जस्ता छन् । यो पनि १२८ जिबी, २५६ जिबी र ५१२ जिबी स्टोरेजका साथ आउनेछ। आइफोन प्रो को सुरुवाती मूल्य ९९९ डलर र प्रो म्याक्सको सुरुवाती मूल्य १०९९ डलर तोकिएको छ ।