२०७८ पुष २९ गते
काठमाडौं । चीनले कोरोना नियन्त्रणका लागि शून्य कोभिड नीति अवलम्वन गरेको छ । यसलाई कार्यान्वयनमा ल्याउन चिनियाँ सरकारले सर्वसाधारणलाई पूर्ण नियन्त्रणमा ल्याउन प्रयास गरिरहेको छ । यसको एक उदाहरण शांक्सी प्रान्तको शियान सहरमा देखिएको छ । यहाँ मानिसलाई क्वारेन्टिनमा राख्न फलामको बाकस समेत बनाइएको छ ।
डेली मेलको रिपोर्ट अनुसार गर्भवती महिला, बच्चा र बूढापाकालाई समेत यी बाकसभित्र राख्न बाध्य बनाइएको छ । राती पनि मानिसलाई उनीहरुको घरबाट निकालेर क्वारेन्टिन सेन्टरमा पठाइएको छ ।
२ करोड मानिस घरमै कैद
चीनमा ‘ट्रयाक–एन्ड–ट्रेस’ रणनीतिका अनुसार पोजिटिभको सम्पर्कमा आउने मानिसलाई पत्ता लगाएर उनीहरुलाई क्वारेन्टिन सेन्टरमा पठाइन्छ । हाल पनि २ करोड मानिसलाई उनीहरुकै घरमा कैद गरेर राखिएको छ । यी मानिसलाई खानेकुरा किन्न बाहिर जाने अनुमति समेत दिइएको छैन ।
बेइजिङमा शीतकालीन ओलम्पिकको तयारी
चीन आगामी महिना बेइजिङमा हुन गइरहेको शीतकालीन ओलम्पिकको तयारी गरिरहेको छ । यसै कारणले पनि चीनले आम नागरिकलाई धेरै कडाइ गरिरहेको छ । कयौँ स्थानमा त सोशल मिडियाको माध्यमबाट सहयोग मागिँदै आएको छ ।
२ ओमिक्रोन संक्रमित फेला परेपछि ५५ लाख घरमै कैद
कोरोना नियन्त्रणका लागि चीन सरकार यती कडाई गर्दैछ कि अनयांग सहरमा २ ओमिक्रोन फेला परेपछि लकडाउन नै लगाइएको छ ।
यो सहरको जनसंख्या ५५ लाख छ । यस भन्दा पहिले १ करोड ३० लाख जनसंख्या भएको शीआन सहर र ११ लाख जनसंख्या भएको युुझोउ सहरमा लकडाउन गरिसकेको छ । चीनमा अब कुुल १.९६ करोड जनसंख्या लकडाउनमा छ । ठूलो परिमाणमा कोभिड परीक्षणका लागि यो लकडाउन लागू गरिएको हो ।